Festa giroan bukatu dira Udal Euskaltegiaren 25. urteurreneko ospakizunak
2010-06-24 ¦ udal euskaltegiak
Lehengo eta oraingo ikasle, irakasle, langile eta ordezkari politikoak, guztira 80 lagun inguru, elkartu ziren joan den larunbatean (2010-6-19) Kiruri jatetxean egin zen bazkarian.
Ikasturteko eskolak amaitzear, Azpeitiko Udal Euskaltegiak joan den astebukaeran agurtu zituen bere sorreraren 25. urteurrena ospatzeko antolaturiko ekitaldiak. 2009-2010 ikasturtea berezia izan da Euskaltegiarentzat; joan den udazkenetik hasita, hainbat ekitaldi eta hitzordu berezi izan dira, Euskaltegian bertan zein kanpoan, sorrerako mende laurdena gogoan.
Azken hitzordua, azken festa, ospakizunen bukaerako bazkaria izan da. Lehengo eta oraingo ikasle, irakasle, langile eta ordezkari politikoak, guztira 80 lagun inguru, elkartu ziren joan den larunbatean (2010-6-19) Kiruri jatetxean egin zen bazkarian.
Omenalditxoa, bertsoak eta festa
Denetarako tartea izan zen larunbateko bazkarian; besteak beste, aspaldiko lagunak agurtzeko. Orain dela 25 urte Azpeitian Udal Euskaltegia martxan jarri zuten lau irakasleak han ziren: Patxi Saez, Kontsuelo Gorostidi, Pello Elorza eta Ane Amondarain (hurrenez hurren, goiko argazkian).
Hasierako haietatik bi, Pello Elorza eta Patxi Saez, Euskaltegia sortu zenetik gaur arte ibilbide osoaren parte eta lekuko izan diren bakarrak dira. Hori dela eta, gaur egungo lankideek omenalditxoa eskaini zieten, bazkaritara elkartutako gainerako guztien laguntzaz, bertso eran.
Gorka Tolosa irakasle ohiak ere bertso bidez egin nahi izan zuen oso txalotua izan zen ekarpena. Bederatzi bertsotan laburbildu zituen Euskaltegiaren ibilia eta berak han ezagututakoen aipamena. Horietako lau ekarri ditugu hona:
"Hona istoritxoa gutxi gora-behera; behintzat kontatutako gauzen arabera. Barrakoi batzuetan izan zen hasera: neguan hozkailura udaran labera, hotza bezain beroa dalako euskera.
Patronatura heldu ginan azkenean. Leku atsegin, goxo epel bat finean. Baina musika-eskola jarri zan gainean: Perkusioa ostegun ta astele(h)nean. Euskera ikasteko erritmo onean.
Ikaslea zu beti bertatik-bertara. Urrundik etorriak zenbaitzu bertara. Gelan zenbat nerbio ta zenbat algara! Gozagarri bihurtu dadila euskara zaila baita ikasten maitatzen ez bada.
Eta azkena zuri aipatuz ostera. Nahiz eta egon ume jipoitu antzera. Gehitxotan negozio iturri gainera, Baina zeran bezela zeralako zera. Bihotzez maitte zattut, muxu bat euskera."
Bertsotarako ez ezik, dantzarako eta algararako tarterik ere ez zen falta izan. Giro ona nagusitu zen, eta amaiera polita izan zuten horrenbestez 25. urteurreneko ospakizunek.